Словачката Влада на премиерот Роберт Фицо воведе уште една мерка на поевтинување на железничкиот превоз, пренесе дописникот на МИА од Прага.
По минатогодишното воведување на бесплатни билети за возење со воз за ученици, студенти и пензионери, од февруари е воведен и педесет процентен попуст на неделни и месечни билети.
Иако луѓето кои редовно го користат железничкиот сообраќај ги поздравуваат мерките, луѓето кои патуваат со автобус или автомобил, сметаат дека тоа е неправедно фаворизирање на одредена одбрана група.
Одлуката на премиерот Фицо е критикувана и од опозицијата, која смета дека носењето на мерки за масовни попусти, една година пред оддржување на парламентарни избори е со цел да се купат што повеќе гласови.
За поевтинувањето на цените на железничкиот сообраќај, словачката Влада ќе треба да одвои околу 1,3 милиони евра од Буџетот. Очекувањата се дека со мерките, дел од луѓето кои досега патувале со автобус ќе почнат да го користат железничкиот сообраќај.