Либиските власти денеска уапсија повеќе од 600 мигранти и бегалци кои неколку месеци кампуваа пред поранешната канцеларија на Високиот комесаријат на ОН за бегалци (УНХЦР) во Триполи, соопштија две хуманитарни организации.
– Загрижени сме поради притворањето на стотици мигранти, бегалци и баратели на азил, вклучувајќи жени и деца, изјави претставникот на Норвешкиот совет за бегалци, Дакс Роке.
Хуманитарната организација наведе дека акцијата за евакуација рано утринава била „остра“ бидејќи биле запалени шатори и импровизирани засолништа за мигранти пред центарот кој УНХЦР го затвори минатиот месец.
– Нашите медицински тимови спасија повредени луѓе при апсењето утринава, вклучително и лице рането од огнено оружје, изјави Томас Гарафало, регионален директор на Меѓународниот комитет за спасување.
Во слична операција во октомври во Триполи, едно лице загина, а 15 беа повредени.
Тогаш беа уапсени најмалку 5.000 луѓе, но неколку дена подоцна околу 2.000 мигранти избегаа од центарот, а шестмина беа убиени од либиските чувари, соопшти тогаш Меѓународната организација за миграција (ИОМ).
Либија е главна рута за илјадници мигранти, главно од субсахарскиот дел на Африка, кои се обидуваат да стигнат до Европа преку море.