Шпански галеон со злато и накит во вредност од стотици милиони, кој потонал пред стотици години, откриен е крај брегот на Колумбија, соопшти колумбискиот претседател Хуан Мануел Сантос, цитиран од ДПА.
Бродот бил потопен од Британците пред повеќе од 300 години за време на Војната за шпанското наследство, заедно со скапоцен товар и стотици луѓе на него.
„Одлични вести: Го најдовме галеонот „Сан Хозе “, напиша Сантос во Твитер. Повеќе детали ќе бидат откриени на прес-конференција, закажана за подоцна денеска.
Остатоците од галеонот (голем трговски едреник по обликот на трупот сличен на галија) беа пронајдени крај островите Росарио, во колумбиски води, на околу 100 километри од градот Картагена.
Војната за шпанското наследство траела од 1701 до 1714 година.