Индонезиската Влада денеска треба да донесе одлука за тоа кога муслиманите во таа држава треба да го започнат Рамазанскиот пост.
Државната интервенција е неопходна поради тоа што три различни исламски здруженија ги известиле своите следбеници за три различни почетоци на постот.
Според најбројната муслиманска група Нахдлатул Улама постот треба да почне в недела, а според исто така бројната група Мухамадијах Индонезија в сабота. Во некои делови на Суматра, постот пак започна денеска.
Заедно со министрите и верските водачи точниот почеток на постот ќе го определат и претставници на институтот за проучување на вселената. Сите тие треба да се договорат кога токму ќе се случи Месечината да се најде во положба која според традиционалната астрономија наложува почеток на постот.
Индонезија има најбројна муслиманска популација во светот, но стриктното почитување на исламските прописи во оваа држава почна да се спроведува кон крајот на минатиот век.