Шумските пожари кои беснеат во австралиската држава Викторија веќе неколку дена ги проголтаат домовите, соопштија властите, предупредувајќи дека прогнозата за „екстремни горештини“ за вториот дел од неделата може дополнително да ги поттикне шумските пожари.
Премиерката на Викторија Џасинта Алан потврди дека се уништени шест домови, додавајќи дека тоа е „многу тешка вест“ за семејствата.
Покрај материјалната штета, настрада и добиток, а повеќе од 2.000 луѓе беа принудени да ги напуштат градовите на запад и да се упатат кон градот Баларат, 95 километри западно од главниот град на Викторија, Мелбурн.
Австралија се бори со временскиот феномен Ел Нино, кој обично се поврзува со екстремни настани како што се пожари, циклони и суши.
Во неделата во Викторија гореа повеќе од 15 шумски пожари. Најсериозниот пожар, рангиран како втор најопасен, гори во близина на неколку оддалечени градови, соопшти државната агенција за управување со вонредни состојби.
Алан рече дека има „загриженост за времето оваа недела, особено од среда до четврток“.
„Она што веќе го знаеме е дека показателите се во екстремен опсег“, рече таа, додавајќи дека надлежните служби ќе се состанат во недела за да ги планираат активностите за следната недела.
Околу 1.000 пожарникари со поддршка на повеќе од 50 авиони се борат со пожарите.
Австралискиот премиер Ентони Албанес во неделата вети дека ќе ја обезбеди сета поддршка неопходна за да и помогне на државата Викторија откако неколкудневните шумски пожари уништија домови, откако властите предупредија дека екстремната топлина може да ги поттикне пожарите оваа недела.
„Ќе обезбедиме каква било поддршка што Викторија ќе ја побара“, им рече Албанес на новинарите.