Во Азербејџан денеска се одржаа парламентарни избори на кои владејачката „Нова партија на Азербејџан“ на претседателот Илхам Алиев освои најмногу гласови, покажуваат излезните анкети.
Според тие анкети, владејачката партија ќе има мнозинство со освоени 69 мандати од 125 места во парламентот, додека независните кандидати освоиле 41 пратеничко место.
Излезни анкети се спроведени на 1.053 избирачки места, со маргина на грешка од 3,6 до 3,9 проценти.
На денешните предвремени парламентарни избори во Азербејџан право на глас имаа 5.329,460 избирачи.
Претседателот на Азербејџан, Илхам Алиев, издаде наредба за распуштање на парламентот на 5 декември минатата година, а Парламентот речиси едногласно го побара тоа од него откако премиерот поднесе оставка.
Околу 1.314 парламентарни кандидати учествуваат на предвремените парламентарни избори во Азербејџан, додека вкупно 2.431 лица се пријавиле да се кандидираат на парламентарните избори. Партијата со најголем број кандидати на парламентарните избори во Азербејџан е Нова партија на Азербејџан (НАП), со 122 кандидати. Партијата Мусават (Еднаквост) има 23 кандидати за парламентот, Партијата Умид (Надеж) – 19 кандидати, Партијата на азербејџански народен фронт – 13 кандидати, а Обединетата азербејџанска партија – 12 кандидати.
Речиси 90.000 локални набудувачи се акредитирани за предвремените избори, а бројот на меѓународни набудувачи кои добиле акредитација е 883. Тие претставуваат 59 меѓународни организации од 58 држави.