Меѓународната непрофитна организација „Викиликс“ објави вчера нова серија документи за кибершпионажа на ЦИА, со кои се опфатени повеќе американски безбедносни служби, вклучувајќи ги и Министерството за внатрешна безбедност, Агенцијата за национална безбедност и Федералното истражно биро.
На официјалниот сајт на „Викиликс“ се објавени тајни документи од проект на ЦИА, наречен „Експрес лејн“ (ExpressLane).
„Експрес лејн“ се инсталира и стартува од Одделот на техничките служби на ЦИА со предлог за ажурирање на програмите. Како резултат на тоа, Агенцијата добивала пристап до базите на податоци на други служби без нивно знаење.
Објавените документи се дел од списите од серијата „Волт 7“, едно од најголемите протекувања на доверливи информации на ЦИА. Тука се вклучени речиси 10.000 документи и фајлови, кои се зачувани во изолираната внатрешна мрежа на Центарот за киберразузнавање, кој се наоѓа во седиштето на ЦИА во Ленгли, државата Вирџинија.
„Викиликс“ започна да објавува информации за методите за кибершпионажа на ЦИА на 7 март оваа година.