Во време кога Австрија поднесе пријава против непознати лица, поради вестите дека германската разузнавачка служба за Американците наводно ги шпионирала австриските институции, откриена е нова станица за прислушување, овој пат на зградата на британската Амбасада во Виена.
Според извештајот на австриската државна телевизија ОРФ, на зградата на бритранската Амбасада во Третиот виенски округ постои сомнителна конструкција на поткровјето, пренесува Танјуг.
Наводно таму се наоѓаат антени, како уреди за прием, така и уреди за испраќање фреквенции од мобилна телефонија со цел шпионирање на австриската мрежа на мобилната телефонија.
Оваа конструкција постои повеќе години, на што укажуваат надворешните траги.
Покривната конструкција на британската Амбасада потсетува на друга веќе позната станица за прислушување, како што е таа на зградата на Амбасадата на САД и на таа на ИЗД Тауер, спроти виенското седиште на Обединетите нации.
Според ОРФ доколку овие станици за прислушување се меѓусебно поврзани, тоа би овозможило директно надгледување на сообраќајот во мобилната мрежа на Австрија.
Во Австрија веќе со денови е покрената бурна дискусија во врска со шпионажата, откако германските медиуми објавија дека БНД за американската служба НСА ги шпионирал австриските институции, меѓу останатите и полицијата.