Пред средбата со кинескиот претседател Си Џинпинг, американскиот претседател Доналд Трамп му нареди на Министерството за одбрана на САД веднаш да продолжи со тестирањето на нуклеарно оружје на рамноправна основа со другите нуклеарни сили.
„Поради програмите за тестирање на други земји, му наложив на Министерството за одбрана да започне со тестирање на нашето нуклеарно оружје на рамноправна основа. Тој процес ќе започне веднаш“, рече Трамп на Truth Social пред средбата со Си во Јужна Кореја.
„Русија е втора, а Кина е на далечно трето место, но ќе бидат изедначени во рок од пет години“, нагласи Трамп.
Путин во средата изјави дека Русија успешно го тестирала нуклеарното суперторпедо „Посејдон“, за кое воените аналитичари велат дека е способно да ги уништи крајбрежните области со активирање огромни радиоактивни океански бранови.
Додека Трамп ја заостри и својата реторика и став кон Русија, Путин јавно ја покажа својата нуклеарна моќ со тестот на новата крстосувачка ракета „Буревестник“ на 21 октомври и вежбите за лансирање нуклеарно оружје на 22 октомври.
САД последен пат тестираа нуклеарно оружје во 1992 година.
Тестовите даваат докази за тоа што може да направи секое ново нуклеарно оружје, но и за функционалноста на постарото оружје.
Покрај обезбедувањето технички податоци, таков тест би се сметал од Русија и Кина како намерно потврдување на американската стратешка моќ.