САД подобро ги разбираат условите под кои Русија би била спремна да ја заврши војната во Украина откако претставникот на претседателот Доналд Трамп, Стив Виткоф, се сретна со рускиот претседател Владимир Путин, изјави вчера американскиот државен секретар Марко Рубио.
„Можеби првпат откако започна оваа администрација, имаме некои конкретни примери за работите што Русија би ги барала за да ја заврши војната“, рече Рубио во интервју за емисијата „Кудлоу“ на Фокс бизнис нетворк, додавајќи дека клучните елементи на секој договор би вклучувале територија.
Рубио рече дека „сè уште има многу работа“ пред Трамп и неговиот руски колега, Владимир Путин, да се сретнат за да ја завршат војната во Украина.
Претходно, американскиот претседател изјави дека е „отворен“ за таков состанок со Владимир Путин, како и со украинскиот претседател Володимир Зеленски, според Белата куќа.
По посетата на Москва на неговиот специјален пратеник Стив Виткоф, која беше опишана како „продуктивна“, американскиот претседател ги информираше неколку европски лидери дека има намера лично да се сретне со својот руски колега, можеби уште следната недела, а потоа да одржи состанок со украинскиот претседател, објавија „Њујорк тајмс“ и „Си-Ен-Ен“.
Американскиот пратеник се сретна со Путин во Москва два дена пред истекот на ултиматумот на САД до Русија со кој се бара крај на конфликтот во Украина. „Претседателот сака да ја заврши војната“, повтори Рубио.
„Во следните неколку дена ќе разговараме со нашите европски сојузници и Украинците за да видиме каков напредок можеме да постигнеме во тоа“, објасни тој. „И потоа, се надевам, работите ќе продолжат да напредуваат и многу наскоро ќе има можност претседателот да се сретне и со Владимир Путин и со претседателот Зеленски во одреден момент, се надевам во блиска иднина.“
„Но, очигледно многу работи треба да се случат пред тоа“, рече американскиот државен секретар. Кога станува збор за евентуален нов пакет санкции на САД против Русија, тој рече дека Трамп ќе донесе одлука за тоа во следните еден или два дена.