Шест лица загинаа, а некои останаа заробени во зградата откако денеска избувна пожар во трговски центар во Кина, јавува кинеската државна телевизија CCTV.
Пожарот избувнал околу 18 часот по локално време во трговски центар во градот Зигонг, во кинеската провинција Сечуан. На снимката која се појави на социјалните мрежи се гледа огромен облак од црн чад како се издига над 14-катницата.
Речиси 300 работници за брза помош и десетици возила пристигнаа на местото на настанот.
Противпожарната единица го изгаснала пожарот во 20 часот и 20 минути.
Од центарот се спасени 30 лица. Не е познато колкумина се уште се заробени.
Во јануари избувна пожар во зграда во Кина, при што загинаа најмалку 39 луѓе. Неколку дена пред тоа изгоре интернат во провинцијата Хенан, при што загинаа 13 деца, пишува CNN.