Рускиот претседател Владимир Путин денеска прогласи воена состојба во четири окупирани региони на Украина, чија анексија неодамна беше прогласена од Москва.
Путин ова го изјави на состанокот на Советот за безбедност во време кога проруските власти во Херсон го евакуираат тој град, а Русите насилно ја напаѓаат енергетската инфраструктура на Украина.
Објавувањето на воена состојба во Доњецк, Луганск, Херсон и Запорожје ќе бара Кремљ, барем формално и законски, да има уште построга контрола врз тие четири украински региони.
На состанокот на Советот за безбедност, Путин го претстави воведувањето на воената состојба како техничко, додавајќи дека во тие региони веќе постои де факто воена состојба, но тоа е одговор на руските воени порази и на украинската контраофанзива на исток и југ, објави на Твитер Макс Седон, шеф на московската канцеларија на Фајненшл тајмс.