Соединетите Држави посегнаа до Кина за да побараат разговори за тарифите од 145 отсто наметнати од претседателот Доналд Трамп, а вратата на Пекинг е отворена за разговори, соопшти утринава кинеското Министерство за трговија, што сигнализира потенцијално олеснување на трговската војна.
САД треба да бидат подготвени да преземат акција за да се поправат „погрешните“ практики и да се откажат едностраните царини, соопшти Министерството за трговија, додавајќи дека Вашингтон мора да покаже „искреност“ во преговорите.
„Обидот да се искористи разговорот како изговор за принуда и изнуда нема да успее“, велат од Министерството за трговија.
Пекинг отворено го изрази својот гнев поради царините, за кои вели дека не можат да го запрат растот на втората по големина економија во светот. Својот гнев го фокусираше на поттикнување на јавна и глобална осуда на американските ограничувања за увоз.
Покрај користењето на својата пропагандна машина за да се одмазди на тарифите, Кина, исто така, тивко креираше список на американски производи што ќе ги изземе од одмаздата од 125 проценти, вклучувајќи одредени лекови, микрочипови и млазни мотори, објави Ројтерс.
Од американска страна, официјални лица, вклучително и министерот за финансии Скот Бесент и економскиот советник во Белата куќа, Кевин Хасет, исто така изразија надеж за напредок во смирувањето на трговските тензии.
Кина сака да се сретне и да разговара за трговијата, а наскоро ќе следат разговори, изјави синоќа за Фокс њуз шефот на американската дипломатија Марко Рубио.
„Нашиот министер за финансии Скот Бесент е вклучен во тие напори и нивните дискусии ќе следат наскоро“, рече тој, додавајќи дека постои прашање колку САД треба да купат од Кина во иднина.
Трамп прексиноќа рече дека верува дека има „многу добри шанси“ неговата администрација да постигне договор со Кина.
Тој го изјави ова неколку часа откако кинескиот претседател Си Џинпинг ги повика официјалните лица да преземат мерки за да се прилагодат на промените во меѓународната средина, без експлицитно да ги спомене Соединетите држави.