Шпанската полиција уапси седуммина српски државјани во Естепона, под сомнение дека во вила киднапирале и мачеле луѓе. Во објектот полицијата откри просторија опремена за мачење и заплени повеќе парчиња огнено оружје.
Снимките од внатрешноста на вилата покажуваат просторија целосно обложена со пластика. Во средината стоеше столче, а во близина полицајците пронајдоа чекан, за кој постои сомнеж дека го користеле за физичко малтретирање. На подот пронајдоа пиштол и пластични врски за врзување.
🇪🇸 En Estepona, una mujer llamó a la Policía cuando su pareja no regresó de una reunión.
Los agentes terminaron rescatando a dos hombres heridos y descubriendo una habitación preparada para tortura.
Hay varios detenidos vinculados presuntamente a una red criminal serbia.
El…
— Quantum Pulse Media (@quantumpulsehq) September 24, 2026
При претресот на вилата и околината, полицијата пронајде и две автоматски пушки АК-47, уште еден пиштол и три рамки со муниција. Оружјето го испрати на балистичко вештачење за да утврди дали го користеле во други кривични дела, меѓу кои и случаи во Марбеља, оддалечена околу 30 километри.
При упадот во вилата, полицајците затекнаа двајца голи и крвави мажи, врзани во просторијата.
Полицијата ги уапси Филип Ј. (25), Марко Н. (31), Зоран Н. (35), Иван М. (24), Секулиќ М. (27), Лео Ј. (29) и Алекс К. (24). Според полицијата, ниту еден од нив немаше пријавена адреса.
Во вилата полицијата пронајде и биолошки материјал, кој им помогна на истражителите да идентификуваат други членови на српска криминална група.
Според истражни извори, групата се занимава со трговија со кокаин и хашиш, како и со изнуда, а активностите ги спроведува во повеќе региони во Шпанија. Националната полиција соопшти дека дел од уапсените претходно имаат полициски досиеја за насилни грабежи и трговија со дрога.
Истражителите сметаат дека и двајцата мажи кои ги пронајдоа во вилата – 45-годишниот Мигел Анхел од Кадиз и 31-годишниот Хамза од Сеута – се членови на истата криминална организација. И двајцата претходно се осудувани.
Извор близок до истрагата изјави дека досегашните сознанија упатуваат на внатрешна пресметка, поради сомнеж дека жртвите не ја завршиле задачата што им ја доверила групата.
Полициски извори наведоа дека еден од наводно киднапираните мажи го уапсија заедно со седумтемина српски државјани.
Просторијата за мачење ја откри полицијата откако партнерката на еден од мажите пријави дека тој заминал на „сомнителна“ работа. Таа кажа дека партнерот ѝ рекол да повика полиција доколку не ѝ се јави во рок од десет минути.
Полицајците пристигнаа пред вилата, забележаа дека светлата се вклучени и повеќепати заѕвонија. Кога се отвори автоматската врата, видоа двајца маскирани мажи.
Според документите на шпанските власти, потоа низ кујнската врата истрча гол маж со крваво лице. Тој во паника викна: „Ме киднапираа и ќе ме убијат!“
Еден од маскираните мажи почна да бега со огнено оружје во рацете. Од вилата истрчаа уште неколку лица. Еден од нив фрли торба во дворот на соседната куќа. Во торбата полицијата пронајде автоматски пушки АК-47.
Во полициската потера што следеше, повреди добија тројца полицајци.