Палестинскиот новинар од Појасот Газа Мухамед Смири објави видео од целосно уништената населба Ал Римал, а во меѓувреме Израел го бомбардираше граничниот премин Рафах што ги поврзува Газа и Египет.
На видеото објавено на Твитер се гледа дел од градот кој е целосно уништен од израелските воздушни напади. Министерството за здравство на Газа соопшти дека во израелските напади загинале најмалку 770 луѓе, а повеќе од 4.000 се ранети. Обединетите нации соопштија дека повеќе од 180.000 жители на Газа останале без покрив над главата, а многумина се тискаат на улиците или во училиштата.
Израелското бомбардирање ја погоди областа на граничниот премин Рафах меѓу Појасот Газа и Египет во вторникот, изјавија палестинските власти и египетските безбедносни извори, загрозувајќи ги операциите на единствената формална излезна точка на јужната граница на Газа.
Министерството за внатрешни работи на Газа, кое го раководи Хамас, рече дека бомбардирањето предизвикало прекин на работата на преминот и дека египетскиот персонал ги предупредил своите палестински колеги да се евакуираат.
Al-Rimal neighborhood, nothing but destruction. #Gaza pic.twitter.com/vUtgLW7WCN
— Muhammad Smiry 🇵🇸 (@MuhammadSmiry) October 10, 2023
Нападот уследи по сличен инцидент во понеделникот, кој делумно ги прекина граничните операции, иако египетските безбедносни извори рекоа дека пристапот за регистрираните патници и хуманитарните активности биле обновени до вторник наутро.
Рафа е единствениот можен премин кон египетскиот Синајски Полуостров за 2,3 милиони жители на Газа. Пристапот е строго контролиран под блокада на движењето на стоки и луѓе од Газа од страна на Египет и Израел.
Претходно денеска, израелската војска ја ревидираше препораката на еден од нејзините портпароли, Палестинците кои бегаат од нејзините воздушни напади во Појасот Газа да се упатат кон Египет.
Израелскиот Канал 12 објави дека израелските власти ги предупредиле своите египетски колеги да не доставуваат помош за опколениот Појас Газа, велејќи дека ќе извршат воздушни напади врз камионите кои превезуваат материјали во областа.
Набргу по објавувањето, колоните камиони со гориво и египетска стока кои требаше да влезат во Газа преку јужниот граничен премин со Египет се повлекоа од преминот Рафах, соопшти Канал 12. Преминот во моментов е затворен на неодредено време.
Кога го контактирале за коментар во врска со заканата за напад на камиони со хуманитарна помош, портпаролот на ИДФ рече дека се запознаени со извештајот на Канал 12, но не сакале да потврдат дали упатиле закана до конвојот со хуманитарна помош.
Без коментар – се што можеме да кажеме е дека следиме наредби од политичките ешалони, а Министерството за одбрана нареди опсада“, велат оттаму.
Израелските власти претходно најавија целосна опсада на Појасот Газа, со прекини на сите извори на вода, гориво и храна.
Израел ја напаѓа Газа со најжестоките воздушни напади во 75-годишната историја на конфликтот со Палестинците откако Хамас во саботата изврши смртоносен упад во Израел.