Најмалку 35 лица загинаа, а речиси 400 се повредени во бурите што ја погодија северна Јапонија во последните две недели, соопшти денес јапонската влада.
Петнаесет префектури се погодени, а снегот достигна до два метра во најтешко погодените области, објави АП.
Најголем број смртни случаи е пријавен во префектурата Ниигата – 12, вклучувајќи маж на околу 50 години пронајден на покривот на куќа и постар маж кој паднал додека чистел снег во градот Нагаока.
Седум смртни случаи се пријавени во префектурата Акита и пет во Јамагата.
Бројот на повредени низ целата земја е 393, вклучувајќи 126 тешко повредени, од кои 42 во Ниигата.
14 куќи се оштетени.
Главниот секретар на кабинетот, Минору Кихара, предупреди дека топењето на снегот може да предизвика лизгање на земјиштето и ги повика граѓаните да користат шлемови и јажиња при чистење на снегот.
Властите формираа неколку работни групи за да реагираат на погодените области, а прогнозите предвидуваат повеќе снежни врнежи во текот на претстојниот викенд.