Градоначалникот на Болоња, Матео Лепоре, вечерва организира протест на градскиот плоштад „Пјаца Нетуно“ поради смртта на Абдерахим Факир, 42-годишен Мароканец кој почина синоќа откако полицијата го собори на земја и се обиде да му стави лисици.
На видеото снимено од случаен минувач, се слуша како Факир вика „помош“ и „застанете“ додека полицијата се обидува да го совлада, пред тој да почине.
Полицијата била повикана да интервенира во населбата Пиластро бидејќи Факир покажувал знаци на „ментална криза“, го нарушувал јавниот ред и мир и се однесувал чудно, утврдиле истражителите.
Тој наводно му се заканувал на маж кој штотуку го паркирал својот автомобил во гаражата. Полициските службеници првично се обиделе да го смират, но тој почнал да се однесува агресивно и да удира по полициското возило. Потоа го совладале со употреба на спреј и се обиделе да му стават лисици на рацете и нозете.
„Тој живееше легално во Италија уште од детството, но стравуваше од депортација“, изјави Барбара Спинели, адвокатка која му помогнала на Факир да ја продолжи дозволата за престој.
Од полицијата соопштија дека снимките од камерите што ги носеле службениците се предадени на истражителите.