Хамас соопшти дека е подготвен да постигне договор за еднократно ослободување на сите заложници кои сè уште се држат во Газа и за петгодишно примирје со Израел, чија армија повторно ја нападна палестинската територија, убивајќи најмалку 35 луѓе.
Делегација на Хамас вчера беше во Каиро за да се обиде со посредници да најде решение за војната предизвикана од нападот на командосите на палестинското исламистичко движење врз Израел на 7 октомври 2023 година. Тие синоќа го напуштија египетскиот главен град по „интензивни разговори“ со египетските власти, се вели во соопштението.
„Хамас е подготвен за размена на заробеници (израелски заложници за палестински затвореници) во еден контингент и за петгодишен прекин на огнот“, изјави еден од неговите претставници за АФП, кој сакаше да остане анонимен.
На 17 април движењето го отфрли израелскиот предлог кој вклучуваше 45-дневен прекин на огнот во замена за враќање на десет заложници заробени на 7 октомври 2023 година, нарекувајќи го делумен и повикувајќи на „сеопфатен договор“.
„Секој предлог што не вклучува целосно и трајно прекинување на војната нема да биде разгледан“, инсистираше Осама Хамдан, висок функционер на Хамас.
Хамас повикува на прекин на непријателствата, целосно повлекување на израелските војници, размена на израелски заложници за палестински затвореници и влез на хуманитарна помош во Газа, каде 2,4 милиони жители, според ОН, се соочуваат со глад и сериозни здравствени проблеми.
Израел, од друга страна, бара враќање на сите заложници и разоружување на Хамас, кој вети дека ќе го уништи. Махмуд Мардави, лидерот на Хамас, повтори дека сака „сеопфатен договор“ кој ќе содржи „меѓународни гаранции“.
„Израел може да ја продолжи војната по делумен договор, но нема да може да го стори тоа по сеопфатен договор со меѓународни гаранции“, рече тој во изјавата.
Според палестинската цивилна одбрана, најмалку 35 лица се убиени вчера во Појасот Газа, каде Израел ја продолжи својата воена офанзива од 18 март, по двомесечен прекин на огнот, тврдејќи дека сака да го принуди Хамас да ослободи заложници.
Десетмина загинаа во бомбардирањето на куќа во градот Газа, што исто така остави многу други под урнатините, изјави за АФП официјален претставник на Цивилната одбрана Мохамед ал-Мугер. Израелската војска не го коментираше конкретниот инцидент, но потврди дека од 18 март погодила околу „1.800 терористички цели“ и убила „стотици терористи“.
Од 2 март, Израел, исто така, ја блокираше целата хуманитарна помош за опустошената палестинска територија, вклучително и нејзините 2,4 милиони жители, од кои повеќето беа раселени барем еднаш поради конфликтот. Во петокот, Светската програма за храна на ОН (WFP) објави дека ги доставила „последните резерви на храна во кујните во кои се служат топли оброци“, кои „се очекуваше да истечат во наредните денови“.
Вчера, снимката на АФП покажа дека Палестинците чекаат ред во јавната кујна во Нусејрат за да ги наполнат своите чинии со грав во сос од домати. „Трагично е. Нема храна во солидарните кујни, нема храна на пазарите“, рече Ваел Одех, раселениот Палестинец.
„Населението во Газа полека умира“, се пожали Џонатан Витал, директор на Канцеларијата на Обединетите нации за координација на хуманитарни прашања (OCHA).
Нападот на Хамас врз Израел на 7 октомври резултираше со смрт на 1.218 луѓе на израелска страна, од кои повеќето цивили. Од 251 лице киднапирано тој ден, 58 се уште се во Газа, од кои 34 се мртви, според израелската војска.
Според последните податоци на Министерството за здравство на Хамас, најмалку 2.111 Палестинци се убиени од продолжувањето на израелската офанзива на 18 март, со што бројот на загинати во Газа од почетокот на војната достигна 51.495.