Нова тензична ситуација над Црното Море предизвика загриженост во меѓународната јавност, откако дошло до сериозен инцидент меѓу руски ловечки авиони и воен авион на НАТО. Според информациите што ги пренесуваат светските медиуми и безбедносни извори, руски ловци пресретнале летало кое извршувало извидувачка мисија во меѓународниот воздушен простор.
Инцидентот се случил во април 2026 година, а британското Министерство за одбрана дури денес ја објави снимката и деталите од случајот. Според британските медиуми, видеото било задржано поради безбедносни и оперативни причини, а сега е пуштено во јавност како доказ за „опасното и непрофесионално“ однесување на руските пилоти.
Инцидентот се случил во утринските часови, кога два руски борбени авиони со голема брзина се приближиле до авионот на НАТО, изведувајќи, како што се наведува, „опасни и непрофесионални маневри“.
Воени експерти предупредуваат дека ваквите инциденти носат сериозен ризик од ненамерна ескалација.
„Ова е многу сериозна ситуација. Кога воени авиони се доближуваат на мала оддалеченост, секоја грешка може да има катастрофални последици. Ова е јасна ескалација на тензиите во регионот“, изјави безбедносен аналитичар за европски медиуми.
Од НАТО соопштија дека нивното летало дејствувало во согласност со меѓународните правила, додека руското Министерство за одбрана порача дека нивните пилоти реагирале поради „приближување на странски воен авион до руските граници“.
Црното Море во последните години стана едно од најчувствителните геополитички подрачја, особено по војната во Украина и зголеменото присуство на НАТО силите во регионот. Слични инциденти беа регистрирани и претходно, но аналитичарите предупредуваат дека последните случувања се меѓу најопасните досега.
Видео-снимката од инцидентот веќе брзо се шири на интернет, додека светските медиуми предупредуваат дека продолжувањето на ваквите средби може дополнително да ја дестабилизира безбедносната состојба во Европа.