Американската војска го собори балонот кој леташе над САД над Атлантскиот Океан, а за кој тврди дека е кинески шпионски балон, потврди американски официјален претставник, пренесува Си-Ен-Ен. Соборувањето на балоните беше одобрено од американскиот претседател Џо Бајден, додаде истиот функционер за Си-Ен-Ен.
Американската морнарица и крајбрежната стража се ставени во состојба на готовност. Во тек е операција за извлекување на балонот од морето во близина на брегот на Каролина, каде што американската војска наводно го соборила.
Американците затворија три аеродроми, а воздушниот простор долж брегот на Јужна Каролина беше затворен бидејќи воените авиони го гаѓаа балонот над Атлантскиот Океан. На социјалните мрежи веќе е објавено видео од воени авиони како пукаат во балон кој потоа паѓа во океанот.
🚨#BREAKING: The US military has officially shot down the Chinese balloon
📌#MyrtleBeach | #SC
Just seconds ago the US military has officially shot down the Chinese surveillance balloon after it traveled thousands of miles across open seas and the United States for 4 long days pic.twitter.com/sThESrLqvW
— R A W S A L E R T S (@rawsalerts) February 4, 2023
Балонот беше откриен над Монтана во средата, во воена база каде што според извештаите се чуваат 150 интерконтинентални балистички ракети вооружени со нуклеарни боеви глави.
Кина денеска ги отфрли обвинувањата за шпионажа, велејќи дека станува збор за истражувачки балон кој излегол од рутата поради „виша сила“ и ги обвини американските политичари и медиумите дека ја искористуваат ситуацијата за да ја оцрнат Кина. Пентагон во петокот соопшти дека втор кинески балон е забележан во Латинска Америка, но не ја прецизираше точната локација.