Властите во Венецуела одново ја отворија границата со Колумбија, дозволувајќи им на своите граѓани да отидат во соседната држава, за да се снабдат со основните прехранбени производи и со лекови.
Ова е втор пат овој месец, властите во Каракас да им дозволат на Венецуелците да пазарат во соседната Колумбија.
Минатата недела повеќе од 35 илјади лица минале преку границата, за да купат храна, основни потреби за домаќинствата и лекови и медицински препарати.
Според венецуелските медиуми, овој пат во соседна Колумбија минале повеќе државјани на Венецуела, кои со часови чекале на граничниот премин, по дождливо време, за да влезат во соседната држава, а потоа да се вратат назад.
Во август минатата година, Владата на венецуелскиот претседател Николас Мадуро нареди затворање на границата со Колумбија, оправдувајќи го тоа со „спречување на меѓуграничниот криминал“.
Сега се открива дека и минатата година, преку постојано отворената граница со Колумбија, најголемиот број од луѓето минувале во соседната држава за да се снабдат со се она што во Венецуела го неа подолго време.
Венецуела, земја богата со нафта и членка на ОПЕК, се соочува со тешка економска криза, проследена со рецесија и со голем недостиг на храна, на основни производи потребни за секојдневниот живот на лугето и со лекови.
Најголемиот број супермаркети во земјата, а дури и во главниот град Каракас, се празни, а луѓето чекаат со денови за да дојдат до основните продукти.
Опозицијата ја обвинува Владата и посебно претседателот Мадуро, за неснаоѓање и за незнаење да се надмине кризата, за која се тврди дека е последица од водењето идеолошка и социјалистичка економска политика.
Мадуро, пак, тврди дека кризата е последица на „буржоаски заговор„ поттикнат од странство, обвинувајќи ја домашната бизнис заедница за „саботажа“ и за обид за соборување на Владата низ „создавање и одржување на кризата“.