Военопоморски бродови на Италија, Велика Британија, Ирска и од неколку други земји вчера се упатија кон либиските територијални води, подготвувајќи се за последниот бран мигранти, кои треба да бидат спасени од чамците на шверцерите.
Британските власти предупредија дека токму ова лето околу половина милион луѓе може ќе се обидат да го извршат опасниот премин преку Средоземно Море, пренесоа американските медиуми.
Капетан Ник Кук-Прист, командант на британскиот воен брод „Белвек“, изјави дека, според достапните податоци, меѓу 450.00и и 500. 000 мигранти чекаат во Либија за патување преку Средоземно Море, со надеж дека ќе стигнат до италијанскиот брег.
На бродот „Белвек“ се наоѓаше и британскиот министер за одбрана, Мајкл Фалон, кој потврди дека Владата предвидува дека летово стотици илјади мигранти ќе се обидат да го извршат овој опасен премин.
Синоќа, во девет оделни операции на море, беа спасени најмалку 1.900 мигранти. Тие се дел од над 3.000-те бегалци, кои беа забележени вчера и за кои се оцени дека имаат потреба од спасувачка операција, потсетија француските медиуми.
Фалон додаде дека Европа треба да ги обедини своите разузнавачки податоци и да се пресмета со шверцерските банди во Либија, кои ги организираат овие опасни премини преку Море.
-Можеме да се обидеме да го запреме нивното финансирање. Некои заработуваат од несреќата на другите и можеме да направиме повеќе, за да ги следиме парите, подвлече британскиот министер за одбрана.