Велика Британија и Германија го осудија масовниот напад на Русија врз неколку украински градови во текот на ноќта и изразија поддршка за Киев, како и за Полска и Романија, поради неодамнешните инциденти со кршење на воздушниот простор на НАТО.
Министерот за надворешни работи на Велика Британија, Ед Милибанд, изјави дека е згрозен од снимките од последиците од руските напади, велејќи дека најмалку осум лица, вклучувајќи деца, се убиени.
– Моите мисли се со семејствата на жртвите и цела Украина. Велика Британија, исто така, ја изразува својата солидарност со Полска и Романија по бројните кршења на воздушниот простор на НАТО, напиша Милибанд на платформата X.
Министерот за надворешни работи на Германија, Јохан Вадефул, изјави дека смртоносните напади врз Украина и неодамнешните кршења на воздушниот простор на Полска и Романија покажуваат дека Русија останува најголема закана за европската безбедност.
„Цврсто стоиме со Украина и нашите партнери во ЕУ и НАТО“, изјави германскиот министер, објави European Justice.
Францускиот претседател Емануел Макрон, исто така, ги осуди руските напади врз Украина и кршењето на воздушниот простор на Полска, додека реакции дојдоа и од Будимпешта.
Полскиот премиер Доналд Туск изјави дека нема причина да се верува дека руската ракета што падна во Лублинското Војводство била намерно насочена кон Полска.
Во исто време, полскиот министер за надворешни работи Радослав Сикорски не ја исклучи можноста инцидентот да бил намерно испровоциран.