Војници од Албанија, Италија, Полска и Словенија ќе влезат во составот на канадскиот баталјон на НАТО, кој ќе биде лоциран во Летонија на почетокот на 2017 година, пренесе ТАСС, повикувајќи се на министерот за национална одбрана Харџит Саџан.
Според него, Канада, на која НАТО и довери да предводи еден од четирите баталјони во Источна Европа, е подготвена да работи „со нашите партнери од Летонија, Албанија, Италија, Полска и Словенија за зголемување на нашата колективна безбедност”.
Во НАТО баталјонот во Летонија ќе има 1000 војници, од кои од Канада ќе бидат 450. Според податоците на канадски медиуми, Италија може да испрати 140 војници. Засега нема информации за другите земји.
Во почетокот на 2017 година НАТО во Источна Европа ќе распореди четири баталјони. Според информациите добиени од генералниот секретар на Алијансата, Јенс Столтенберг, Канада ќе го предводи овој баталјон во Летонија, Германија – во Литванија, Велика Британија – во Естонија, а САД – во Полска.