Пакетот санкции усвоен од ЕУ против Русија по признавањето од страна на Москва на два сепаратистички ентитета во источна Украина ќе стапи на сила денеска навечер или утре, изјави францускиот државен секретар за надворешни работи, Клеман Бон, јави дописникот на МИА.
-Имаше многу брзи реакции од Европејците, координирани со Американците, Британците. Овие санкции ќе се применат од вечерва, веројатно или најмногу од утре, изјави Клеман Бон на радиото Франс Интер.
Овој прв пакет санкции, кој може „да оди подалеку“, вклучува насочени мерки, особено против руските пратеници кои гласаа за признавање, и финансиски мерки против руските банки.
-Руската држава, руските банки повеќе нема да можат да се финансираат на европските пазари, подвлече Клеман Бон.
Извор: МИА