Украина има морнарица само на хартија. Сè што беше добро во нејзината флота, Русија го задржа по анексијата на Крим, а добар дел од високите украински офицери потоа преминаа на страната на „непријателот“. Без муниција останаа и неколкуте застарени и дотраени бродови, кои Русите ги запленија во подземниот магацин на Инкерман, недалеку од Севастопол.
Сепак, дури и десеткуваната украинска морнарица успеа да и нанесе значителни загуби на Русија. Крузерот „Москва“ е потопен од ракети „харпун“, инаку команден брод на руската Црноморска флота. Неколку бродови беа оштетени во нападите со беспилотни летала во Севастопол, кој е премногу блиску до територијата под контрола на Киев. Поради ова, Русија мораше да пренесе дел од флотата во Новоросијск. Тоа е пристаниште на источниот брег на Црното Море, кое би можело да обезбеди пристојна безбедност за руските воени бродови. Затоа таму веќе се стационирани руски подморници од класата „кило“.
Сепак, Украина неодамна успеа да стигне до Новоросијск. Иако Русија демантираше, се чини дека украинскиот пловечки дрон со 450 килограми експлозив удрил во десантниот брод „Оленегорски Горњак“. За Москва е многу непријатно сознание дека непријателот може да стигне до источниот брег на Црното Море. Киев досега изврши 11 поморски напади со беспилотни летала, при што еден таков уред беше пронајден на плажа на Крим. Најверојатно се расипал и морето го исфрлило на брегот каде што го пронашле Русите.
Ако на тоа се додаде и нападот со дрон на мостот Керч, кој беше тешко оштетен, дефинитивно се добива впечаток дека Украина решила да отвори нов фронт на Црното Море. На некој начин тоа е и логично бидејќи копнената офанзива на Киев не ги даде очекуваните резултати. Украина досега има освоено симболични 200 квадратни километри, вклучувајќи неколку села. Пред неколку дена Русија лансираше свои војници на север и оствари одредени територијални придобивки во правец на Харков. Копнениот фронт е статичен и до крајот на оваа година веројатно нема да видиме големи поместувања во линијата на конфликтот.