Полска сака да ги подигне односите со Велика Британија на највисоко можно ниво, првенствено во областа на одбраната од Русија, изјави денес полскиот премиер Доналд Туск пред неговото заминување за Лондон, каде што двете земји ќе потпишат нов договор за одбрана и безбедност за зајакнување на соработката во услови на растечки безбедносни закани во Европа.
Во исто време, британската влада изјави дека новиот договор ќе придонесе за заштита на британските граници, борба против организираниот криминал, зајакнување на колективната одбрана и продлабочување на соработката со Европската Унија.
Британската влада во соопштението наведува дека двете земји ќе ја споделат својата експертиза и ќе ги координираат одговорите за справување со растечките закани.
Договорот се темели на напорите на британската влада за зајакнување на односите со Европа и подобрување на соработката со Европската Унија во областите на безбедноста и економијата, по сличните договори што Лондон веќе ги постигна со Франција и Германија.
Британскиот премиер Кир Стармер, според соопштението, оценил дека Обединетото Кралство и Полска се веќе блиски сојузници и пријатели, но дека сегашните предизвици во Европа бараат уште посилно партнерство.