Вакцината „Коронавак“ на кинеската компанија Синовак, е ефективна во 91.25 отсто од случаите, покажуваат податоците од завршна фаза на испитувања во Турција.
Ова е многу подобар резултат од оној што беше добиен во одвоени тестирања во Бразил.
Бразилските истражувачи, кои исто така спроведуваат тестирања од Фазата три за вакцината, соопштија вчера дека имунизацијата со вакцината на Синовак е повеќе од 50 отсто ефективна, но по барање на компанијата не ги објави комплетните резултати, што покрена прашања околу транспарентноста.
Денеска, турските научници на прес-конференција заедно со министерот за здравство Фахретин Коџа соопштија дека не забележале сериозни несакани ефекти од вакцината за време на тестирањата, освен едно лице што имало алергиска реакција. Тестирањата во Турција започнаа на 14 септември, а во нив учествувале 1.322 доброволци.
„Сега сме сигурни дека вакцината е ефективна и безбедна за турскиот народ,“ рече Коџа.
Синовак е првата кинеска компанија-производител која објави детали за доцна фаза на клинички испитувања, откако конкурентските вакцини на Фајзер, Модерна и АстраЗенека објавија дека нивните производи имаат ефективност од над 90 отсто.
Турција нарача 50 милиони дози од вакцината на Синовак, кои требаше да бидат испорачани на 11 декември, но пратката беше одложена и се очекува да пристигне во следните денови.