Во Турција денес стапи на сила забрана за пристап до социјалните мрежи за деца помлади од 15 години.
Процесот на проверка на возраста за постоечките кориснички сметки ќе трае до 31 март 2027 година; во текот на овој преоден период, операторите на социјалните мрежи постепено ќе ги затвораат постоечките сметки што им припаѓаат на деца, пренесува агенцијата Анадолија.
Кон средината на октомври, Турција им забрани на давателите на услуги на социјалните мрежи да нудат услуги на малолетници помлади од 15 години, согласно новите прописи донесени од Дирекцијата за сајбер-безбедност.
Во прописот се наведува дека давателите на услуги „не смеат да обезбедуваат услуги за деца кои немаат наполнето 15 години“.
Исто така, од давателите на услуги се бара да понудат приспособени услуги и да спроведат соодветни мерки за корисниците постари од 15 години, во согласност со прописите. Понатаму, при проверката на возраста мора да се даде приоритет на заштитата на личните податоци, при што ќе се користат методи со кои само се утврдува дали корисникот го исполнува возрасниот услов, без притоа да се утврдува неговиот идентитет.
За да пристапат до некоја социјална мрежа, корисниците ќе треба да поминат низ процес на проверка на идентитетот преку владината платформа за електронски услуги, „e-Devlet“.
Потоа, тие ќе добијат дигитален токен што содржи информации за нивната возраст. Доколку се помлади од 15 години, пристапот ќе им биде одбиен; доколку имаат меѓу 15 и 18 години, ќе можат да пристапат до социјалната мрежа, но со одредени ограничувања.
Испраќањето пораки ќе биде возможно само со сметки на пријатели, преносите во живо ќе бидат забранети, а корисниците нема да гледаат реклами наменети за возрасни.