Повторно на удар беше украинскиот регион Харков, каде што во текот на ноќта руски беспилотни летала го нападнаа градот Балаклија, при што загинаа три лица, соопшти Државната служба за вонредни состојби на Украина.
Според украинските власти, дроновите погодиле станбена населба, предизвикувајќи пожари во две семејни куќи. Во нападот биле оштетени и неколку околни станбени објекти.
Екипите на службите за вонредни состојби интервенирале на терен и ги локализирале пожарите, додека спасувачките и другите надлежни служби работеле на расчистување на последиците и проценка на причинетата штета.
Украинските власти соопштија дека во нападот животот го загубиле три лица, но засега не се објавени дополнителни информации за нивниот идентитет, ниту за евентуални повредени.
Ова е втор напад врз Балаклија за краток период. На 5 август, според украинската новинска агенција Укринформ, руските сили го нападнаа истиот град, при што дел од населението остана без електрична енергија поради оштетувања на енергетската инфраструктура.
Нападите врз украинските градови продолжуваат и понатаму, додека борбите меѓу двете страни не стивнуваат.