Најмалку тринаесетмина од стоте до сега највлијателни политичари во Индонезија не добија доволно гласови за повторен мандат во индонезискиот парламент.
На изборите одржани на 9 април, чии резултати дефинитивно ќе бидат познати до 15 мај, изборната квота не ја поминале сегашниот министер за земјоделство, двајцата потпретседатели на Парламентот и неколку претседатели на парламентарни комисии.
Меѓу губитниците е и Ева Кусуми, лидер на движењето за женски права и меѓурелигиска толеранција. Таа беше меѓу кандидатите на победничката досега опозициона Индонезиска демократска партија на борбата, а сега е меѓу најгласните губитниците кои ставија нишка на сомнеж за регуларноста на изборите.
Сопствена истрага за регуларноста на изборите води и еден од најбогатите луѓе во Индонезија, Сутан Батеогана, чиј сегашен мандат во Парламентот го штитеше од истрага во еден од поголемите корупциски скандали.
Сите што загубиле на изборите се лутат и ги обвинуваат оние што добиле за масовно купување на гласови. Меѓутоа, според домашните и странски набљудувачи на априлските избори, на кои гласаа 186 милиони Индонезијци, имало досега најмалку неправилности.