Белгиската полиција уапси лице осомничено за убиството на три лица во Еврејскиот музеј во Брисел, што се се случи денеска попладне.
Според очевидци, убиецот во музејот пукал врз посетителите и убил две жени и еден маж, додека четвртото лице тешко го повредил, по што побегнал со автомобил.
Минувачите успеале да ги забележат броевите на табличките, така што полицијата набрзо го пресретнала автомобилот и го уапсила напаѓачот, чиј идентитет не е соопштен.
Повеќекратното убиство, за кое се претпоставува дека е извршено од антисемитски побуди, наиде на остра осуда на политичките лидери и јавноста.
Белгискиот министер за надворешни работи Дидие Рејнер, кој се затекна во близина на местото на злосторството во бриселскиот кварт Саблон, прв се огласи преку Твитер и изјави оти е шокиран со ова злосторство.
Министерот за полиција Жоел Милке рече дека смета оти убиството е „антисемитски чин“.
Високиот претставник на ЕУ за надворешна политика и безбедност Кетрин Ештон преку соопштение остро го осуди нападот и ја поздрави брзата реакција на белгиските власти.
Трикратното убиство се случи на ден пред одржувањето на европските и национални избори во Белгија и три дена пред самитот на лидерите на ЕУ во Брисел, во вторник.