Американскиот претседател Доналд Трамп се откажа од рокот што Украина го постави за да го прифати мировниот план поддржан од САД до четврток, велејќи дека „крајниот рок за мене лично е денот кога сè ќе заврши“.
Американскиот претседател додаде дека Русија во моментов се однесува како доминантна страна во војната и дека би било во најдобар интерес на Украина да постигне договор.
„На Русија би можело да ѝ се даде дел од украинската територија во следните неколку месеци“, предупреди Трамп, додавајќи дека се водат разговори за безбедносни гаранции за Украина со европските партнери.
Трамп им рече на новинарите во авионот „Ер Форс Уан“, додека леташе за Флорида за Денот на благодарноста, дека американските преговарачи постигнуваат напредок во разговорите со Русија и Украина и дека Москва се согласила на некои отстапки, но не прецизираше детали, објави Ројтерс.
Трамп рече дека неговиот претставник, Стив Виткоф, наскоро ќе отпатува во Москва за да се сретне со претседателот Владимир Путин и дека неговиот зет, Џаред Кушнер, кој беше вклучен во преговорите за прекин на огнот во Газа, исто така е вклучен во преговорите.
До неодамна, Денот на благодарноста беше „целниот“ датум на Трамп за договор, но тој и неговите помошници сега велат дека сакаат договор што е можно поскоро, без утврден рок.