Високи американски воени и безбедносни претставници, како што е претседателот на Здружениот генералштаб Ден Кејн, го предупредуваат американскиот претседател Доналд Трамп за ризикот од продолжен конфликт и американски жртви во случај на напад врз Иран.
Според извори на Аксиос, Ден Кејн ги советувал Трамп и другите високи претставници дека воената акција против Иран носи значителни ризици, вклучително и можноста за вмешување во продолжен конфликт.
Според извори, на врвот на администрацијата се води интензивна дискусија за тоа како да се одговори на кризата со Техеран и какви би биле последиците од секоја опција.
Ставот на Кејн изворите го сметаат за особено влијателен, со оглед на тоа што тој е врвен воен советник на претседателот.
Иако тој силно го поддржувал планирањето операција против соборениот венецуелски претседател Николас Мадуро, тој зазел повнимателен пристап во случајот со Иран, според Аксиос.
Еден извор го опишал како „неволен воин“ кога станува збор за Иран, наведувајќи дека генералот проценил дека потенцијалната операција би носела поголеми влогови и поголем ризик од американски жртви.
Друг извор рече дека Кејн не е против воена кампања, но дека „реално ги разгледува шансите за успех и последиците што би можеле да следат доколку избувне војна“.
Во меѓувреме, потпретседателот на САД, Џ.Д. Венс, исто така, го истакна ризикот од вклучување во продолжен конфликт за време на внатрешните консултации, но, според изворите, не се спротивставил експлицитно на можен напад.
Висок функционер на администрацијата изјави дека сè уште не е донесена конечна одлука за тоа дали, кога и како да се нападне Иран, нагласувајќи дека секој во администрацијата има улога во процесот на донесување одлуки.