Претседателот на Соединетите Американски Држави, Доналд Трамп, денес објави дека САД ќе воведат царина од 25 проценти за стоки увезени од Индија почнувајќи од 1 август, како и дополнителна казнена давачка поради, како што изјави, купувањето руска нафта од страна на Индија.
Тој исто така изјави дека трговскиот договор со Индија сè уште не е финализиран.
– Иако Индија е наш пријател, со текот на годините сме работеле релативно малку со нив бидејќи нивните царини се превисоки, меѓу највисоките во светот, а тие имаат најстроги и најнепријатни немонетарни трговски бариери од која било земја – напиша Трамп на социјалната мрежа Truth Social.
Тој додаде дека со купување нафта и воена опрема од Русија, Индија индиректно овозможува продолжување на војната во Украина.
– Тие отсекогаш купувале поголем дел од својата воена опрема од Русија и се најголемиот купувач на енергија во Русија, заедно со Кина, во време кога сите сакаат Русија да го запре убивањето во Украина. Сето ова не е добро. Затоа, Индија ќе плаќа царина од 25 проценти, плус казна за горенаведеното, почнувајќи од 1 август, предупреди Трамп.
Трамп објави дека дополнителните царини ќе стапат на сила во петок, како дел од поширок план на ревидирани трговски мерки против неколку земји.
Претходно беа објавени рамките на новите трговски договори со Европската Унија, Јапонија, Филипините и Индонезија, кои, според Трамп, отвораат пазари за американски стоки и овозможуваат зголемување на царинските стапки.