Американскиот претседател Доналд Трамп слета во Шкотска на четиридневна посета што вклучува средби на високо ниво. Посетата на Трамп е неофицијална и во голема мера поврзана со голф. Веднаш по пристигнувањето, тој го пофали британскиот премиер Кир Стармер како „добар човек“ и ја нарече нелегалната миграција „ужасна инвазија што ја убива Европа“.
Американскиот претседател се осврна на нелегалната имиграција и упати остро предупредување до европските лидери.
„Подобро да се смирите или повеќе нема да ја имате Европа. Мора да се смирите“, рече тој.
– Вие дозволувате ова да им се случи на вашите земји и мора да ја запрете оваа ужасна инвазија. Имиграцијата ја убива Европа. Некои европски лидери не дозволија инвазија на нивните земји, нема да ги именувам, и тие не добија доволно признание за тоа, рече Трамп.
Тој, исто така, рече дека ниту еден нелегален мигрант не влегол во САД во изминатиот месец.