Американскиот претседател Доналд Трамп вчера изјави дека Шпанија треба што поскоро да ги зголеми своите трошоци за одбрана на 5 проценти од својот бруто домашен производ (БДП), предупредувајќи дека ќе биде исклучена од НАТО ако не го стори тоа.
За време на прес-конференцијата во Белата куќа по билатералната средба со финскиот претседател Александар Стабс, Трамп рече дека сите сојузници се обврзале да ги зголемат трошоците за одбрана од 2 на 5 проценти од БДП на самитот на НАТО во Хаг во јуни.
„Имавме едно задоцнување. Тоа беше Шпанија. Треба да им се јавиме и да откриеме зошто доцнеле. Тие ги имаат сите услови да го сторат тоа. Интересно е што добро се справуваат благодарение на многу работи што ги направивме. Тие немаат изговор да не го сторат тоа. Но, тоа не е важно. Можеби треба да ги исклучиме од НАТО“, рече Трамп.
Шпанија беше клучна тема на последниот самит на НАТО поради нејзините резерви во врска со зголемувањето на трошоците за одбрана.
Шпанскиот премиер Педро Санчез се согласи со измени во конечната изјава со која се задржува целта од 5 проценти, но со флексибилно толкување според кое Шпанија може да одлучи колку да издвои, сè додека ги исполнува целите поставени од министрите за одбрана на НАТО.