Американскиот претседател Доналд Трамп остро ги критикуваше Републиканците во Конгресот откако Претставничкиот дом лесно изгласа поништување на неговото вето за законот за одбранбена политика.
Вкупно 109 републикански конгресмени, вклучувајќи ја и претставничката од Вајоминг, Лиз Чејни, членка на раководството на Републиканската партија, им се приклучија на демократите во поништување на претседателското вето, за првпат за време на мандатот на Трамп. Се очекува Сенатот да ја разгледа оваа мерка подоцна оваа недела.
Трамп на Твитер ги нападна републиканските пратеници, обвинувајќи го „слабото и изморено републиканско раководство“ дека дозволило да помине лош закон за одбрана.
Трамп поништувањето на гласањето го нарече „срамен чин на кукавичлук и целосно потчинување на слабите луѓе од Биг Тек“.
– Преговарајте за подобар закон или набавете подобри лидери, СЕГА! Сенатот не треба да го одобри НДАА сè додека не се поправи, напиша Трамп.
Нацрт-законот за одбрана, или НДАА, го потврдува зголемувањето на платата за американските трупи од три проценти и одобрува повеќе од 740 милијарди долари за воени програми.
Членовите на Претставничкиот дом вчера гласаа со 322 спрема 87 за укинување на ветото, далеку над двете третини потребни за укинување.
Надгласувањето на ветото го поддржаа 212 демократи, 109 републиканци и независен претставник. Дваесет демократи се спротивставија заедно со 66 републиканци и независни.
Трамп го отфрли нацртот минатата недела, велејќи дека не ги ограничува компаниите за социјални мрежи за кои тврди дека биле пристрасни кон него за време на неговата неуспешна кампања за реизбор. Трамп исто така се спротивставува на дозволувањето за преименување на воените бази кои им оддаваат почит на водачите на Конфедерацијата. ј