Американскиот носач на авиони „Абрахам Линколн“ премина низ Суецкиот канал на пат кон Персискиот Залив, поради заострување на односите со Иран.
Тоа го соопшти шефот на египетското пристаниште, Мохаб Мамеш. Тој изјави дека утринава забележал како носачот минува преку каналот.
Мамеш се состанал и со американското воено аташе во Каиро, генерал Ралф Грувер, кој отпатувал во областа на Суецкиот канал, со цел да го провери статусот на американскиот воен брод.
Белата куќа во неделата испрати носач на авиони и бомбардери Б-52 во Персискиот Залив.
Иранскиот претседател Хасан Рохани вчера предупреди дека Иран ќе престане да се придржува кон одредени делови од нуклеарниот договор од 2015 година и им даде рок од 60 дена на другите потписници на спогодбата да ги исполнат своите обврски, особено кога станува збор за банкарскиот и нафтениот сектор.
Рохани рече дека Иран ќе продолжи со високо ниво на збогатување ураниум, ако светските сили не ги одржат своите ветувања, дадени во рамки на нуклеарниот договор постигнат во 2015 година.