Иранскиот министер за надворешни работи Абас Арагчи денеска изјави дека писмото на американскиот претседател Доналд Трамп до иранските власти „наскоро ќе биде доставено до Техеран преку арапска земја“.
Арагчи ги даде забелешките во телевизиско обраќање откако иранскиот врховен водач, ајатолахот Али Хамнеи минатата недела изјави дека Техеран нема да биде принуден на преговори, објави Ројтерс.
Американскиот претседател Доналд Трамп изјави дека испратил писмо во кое го поканил Иран да преговара за нов нуклеарен договор.
Во 2018 година, Трамп се повлече од нуклеарниот договор од 2015 година и повторно воведе санкции кон Иран, што доведе до тоа Иран да почне да се повлече од своите нуклеарни обврски.
Иран ги негираше тврдењата дека сака да развие нуклеарно оружје, но Меѓународната агенција за атомска енергија предупреди дека Иран брзо збогатува ураниум до 60 проценти чистота, блиску до нивото од 90 проценти потребно за оружје.