Просечните температури во светот оваа година првпат ќе бидат зголемени за еден степен Целзиусов во однос на нивото од пред индустриската револуција, соопшти денеска британската Метеоролошка служба.
Податоците од јануари до септември покажуваат дека просечната глобална температура е за 1,02 степена Целзиусови над нивото од 1850-1900 година, се наведува во извештајот на Мет Офисот, во кој се предупредува дека планетата продолжува да се загрева под влијание на човековите активности.
Британските метеоролози најавуваат дека 2016 година ќе биде исто толку топла колку и оваа година.
Минатиот месец научниците најавија дека во првите девет месеци од 2015 година е достигнат рекордот и годинава ќе биде најтоплата во изминатите 4.000 години.
Во јуни, јули и август оваа година на северната хемисфера е регистрирана највисоката просечна температура во светот од 1880 година, од кога се води ваква евиденција.