Внатре во неописната зграда која служи како седиште на американската тајна служба во Вашингтон, се наоѓа музеј на агенцијата што повеќето туристи никогаш нема да го посетат.
„Повеќето од посетителите се вработени, поранешни вработени, семејства и гости, достоинственици и органи на редот“, вели Мајк Сампсон, архивар и историчар во американската тајна служба.
Според него, причината за ограничениот пристап до музејот се ограничените ресурси и безбедносните предизвици. Просторот со една соба содржи артефакти и реплики кои ја прикажуваат приказната за тајната служба.
Агенцијата е веројатно најпозната по заштитата на американските претседатели, но нејзината првична мисија беше да се бори против финансиската измама. Иронично, претседателот Абрахам Линколн го овластил создавањето на Тајната служба само неколку часа пред да биде убиен. На 14 април 1865 година, тогашниот секретар на Министерството за финансии, по име Хју МекКалоу, отишол кај претседателот Линколн и му предложил да основа агенција исклучиво за борба против фалсификувањето. Во тоа време, една третина од сите пари во САД за време и по Граѓанската војна биле фалсификувани, вели Џејсон Кендрик, исто така архивар и историчар во американската тајна служба.
Тој објаснува дека Линколн бил во Фордовиот театар истиот ден кога го дал усно овластување, иако не потпишал ништо што всушност ја создало Тајната служба. Дури во 1901 година, по атентатот на претседателот Вилијам Мекинли, Тајната служба беше официјално задолжена да ги штити претседателите, но нејзиниот опсег на работа се прошири дури и пред тоа, делумно поради тоа што органите за спроведување на законот и разузнавачките агенции на ФБИ и ЦИА сè уште не беа воспоставени. Кендрик тврди дека Тајната служба била вмешана во измама со земјиште и поштенски марки, трговија со рум и шверц.
„Постои период кога правиме паралелна истрага за Кју Клукс Клан, контра-шпионажа за време на Шпанско-американската војна, Првата светска војна и малку дури и за време на Втората светска војна, дури и откако беше основана ЦИА – вели тој.
Дел од музејската поставка е фокусирана на фалсификати. Други дела ги илустрираат опасностите од претседателскиот живот, како што е прозорецот на блиндирана лимузина што беше погодена со куршум за време на неуспешниот обид за атентат врз претседателот Роналд Реган во 1981 година. Изложен е и пиштолот употребен за време на обидот за атентат врз претседателот Џералд Форд во Сан Франциско во 1975 година.
Денес, Тајната служба продолжува да ги штити шефовите на држави, странските претставници и специјалните настани за национална безбедност.
Нејзините агенти сè уште имаат задача да го чуваат американскиот финансиски систем, кој вклучува истраги за елементи на сајбер криминал.
Центарот за проценка на закани на агенцијата работи со локални партнери низ целата земја за да помогне во борбата против насилството во училиштата и другите насочени напади.
„Бевме погодени и од акциите на терористите. Овде имаме артефакти кои потсетуваат на бомбардирањето на 19 април 1995 година во Оклахома Сити, кога изгубивме шест членови на нашата агенција на теренската канцеларија во тој град“, вели Сампсон.
„Нѐ погоди и 11 септември. Тогаш изгубивме еден член на нашата агенција, специјалниот службеник Крег Милер“, додава тој.
На крајот на краиштата, фактот дека само неколкумина можат да го видат музејот можеби е поентата на неговото постоење.
„Тој простор ни дава можност да размислиме за историјата на нашата агенција, но и да покажеме што работиме овие денови. Можеме да добиеме впечаток за тоа како бевме и како еволуиравме како агенција, како и некои работи што ги правиме денес. Но, тоа ни дава и размислување за тоа како некогаш биле работите“, заклучи Сампсон.