Светот може да се соочи со еколошка катастрофа поголема од онаа во Чернобил, предупреди првиот премиер на Украина, Витолд Фокин.
Фокин, кој е заменик-раководител на трипартитната група која беше формирана во 2014 година за дипломатско решавање на воениот конфликт помеѓу Украина и Русија за регионот Донбас, истакна дека уништувањето на инфраструктурата во регионот по долготрајните бомбардирања, довела до поплавување на илјадници рудници во областа, загадување на почвата и воздухот.
Тој објасни дека катастрофата може да настане од водата во рудниците која може многу лесно да се слее во локалните реки и езера, а на тој начин да дојде и до Црното море.
Со цел да се избегне потенцијалната еколошка катастрофа, Фокин изјави дека потребно е итно чистење на каналите.
„Многумина замижуваат на сето ова, но престојната катастрофа може да стане неизмерно поголема од несреќата во Чернобил и да предизвика многукратна еколошка штета“, додаде Фокин.
Несреќата во нуклеарната централа во Чернобил се случи во 1986 година, кога експлодираше реактор во советската нуклеарка и голема количина радиоактивни материи беа ослободени во околината, а негативните последици ги почуствува цела Европа.