Француската полиција се судри со триесетина Роми во едно предградие на Лион, јави дописникот на МИА од Париз.
Судирот меѓу полицијата и групата Роми се случил во населбата Сант-Фон, предградие на Лион, откако вчера попладнето врз едно полициско возило било фрлано со разни предмети, при што било скршено задното стакло на автомобилот.
Полицијата вечерта спровела акција за идентификување и апсење на сторителите на ова дело. Во блискиот парк, според полицијата, нејзините припадници биле пречекани од триесетина Роми, од блиската дива ромска населба, при што дошло до судир.
Полицијата употребила солзавец за да ги растера напаѓачите и да ја продолжи акцијата. Во операцијата, според полициското соопштение, нема повредени.
Здружението за поддршка на Ромите, за француските медиуми тврди дека полицијата ги кршела бараките на Ромите и стаклата на нивните возила, што беше демантирано од француските власти.