НАТО „нема да биде вовлечен во трката за вооружување“, изјави генералниот секретар на Алијансата, Јенс Столтенберг, оценувајќи дека военото јакнење на организацијата, кое е во тек, претставува одговор на „агресивните дејности на Русија во Европа“.
– НАТО нема да биде вовлечен во трката за вооружување, но мораме да ја зачуваме безбедноста на нашите земји, истакна Столтенберг пред средбата на министрите за одбрана од земјите-членки на НАТО во Брисел.
Алудирајќи на полуостровот Крим, тој нагласи дека „присоединување дел од територија не е дефанзивен, туку агресивен чин“.
– Русија продолжува со испраќање единици и опрема, со цел да го дестабилизира источниот дел на Украина. Нема никаков сомнеж дека Русија е одговорна за агресивните дејствија во Европа, додаде Столтенберг.
НАТО од септември 2014 година одлучи за воено јакнење, со поголем број маневри, формирање реактивни сили кои можат да се распоредат за 48 часа и двојно поголем број на реакциски сили.
Генералниот секретар на Алијансата истакна дека овие мерки се „дефанзивни и согласно меѓународните обврски“.