Специјалните сили на НАТО пристигнаа во Кундуз како поддршка на авганистанските војници откако талибанците го зазедоа стратешкиот град во северниот дел на Авганистан, соопшти денеска Северноатлантската алијанса.
– Специјалните сили на коалицијата се на терен во Кундуз и ги советуваат своите авганистански колеги, истакна портпаролот на НАТО.
Во Кундуз пристигнаа американски, британски и германски војници. Се уште не е познато колку НАТО војници има во Кундиз.
Алијансата соопшти дека американските сили во последните 24 часа извеле вкупно три напади – еден во предградие на Кундуз и два во близина на градскиот аеродром.
Авганистанските сили вчера презедоа контраофанзива за воспоставување на контрола врз Кундуз.
Кундуз е град со 300.000 жители и се наоѓа на стратешката раскрница која го поврзува Авганистан и Пакистан, Кина и Средна Азија. Офанзивата на талибанците за заземање на Кундуз, еден од најголемите и најбогати градови во Авганистан, почна на 28 септември.