Поради сомнителен пакет, улица во центарот на лондонскиот владин кварт, во близина на Даунинг стрит, каде се наоѓа канцеларијата и резиденцијата на премиерката Лиз Трас, денеска е затворена, изјави полицаец кој е на лице место.
Претставник на владата рече дека некои од владините згради долж Вајтхол моментално се испразнети.
Новинар на Ројтерс известува дека стотици луѓе се собрале на Парадата на гардата на коњите во близина на Даунинг стрит.
Британската премиерка Лиз Трас се соочува со зголемени повици за нејзина оставка од нејзината Конзервативна партија само шест недели откако таа влезе во Даунинг стрит.
Трас и нејзиниот поранешен министер за финансии Кваси Квартенг го објавија фискалниот пакет – таканаречениот мини-буџет на 23 септември. Мерките предизвикаа превирања на пазарот, од пад на фунтата до пензиска паника и редок јавен укор од Меѓународниот монетарен фонд, пишува CNBC News.
Најновите планови беа отфрлени во понеделникот од новиот министер за финансии Џереми Хант. Тој е четвртиот човек на таа позиција од јули.