Сирија го осуди израелскиот воздушен удар врз воено-истражувачки центар во реонот на Дамаск и наведе дека тој удар значи објавување војна, јави ДПА.
Сирискиот заменик министер за надворешни работи, Фејсал ал Мекдад изјави за Си-Ен-Ен дека нападот докажува оти Израел е во сојуз со бунтовниците кои се борат за симнување од власт на претседателот Башар Асад.
Тој додаде дека Сирија ќе одговори на ударот на соодветен начин. Во писмо до СБ на ОН сириското МНР наведува дека во „израелската агресија“ убиени се и ранети неколку луѓе и има материјална штета. Тие напади се со цел „да дадат директна поддршка на терористичките групи“ што војуваат со Владата, се додава во писмото.