Генералниот секретар на ОН, Бан Ки Мун ја именува Холанѓанката Сигрид Каг за лидер на здружената мисија на Организацијата за забрана за користење на хемиското оружје при ОН во Сирија.
Тој вчера за својата одлука го извести Советот за безбедност на ОН, кој што во среда треба да ја потврди.
Педесет и двегодишната Каг од 2010 година е заменик на генералниот секретар на програмата на ОН за развој (УНДП).
Таа во 1994 година од Министерството за надворешни работи дојде во ОН. Работеше како регионална директорка на УНИФЕЦ за Блискиот исток, при агенцијата за помош на палестинските бегалци УНРВА и Меѓународната организација за миграција.
Советот за безбедност во петок им даде овластување на Организацијата и ОН да го уништат сириското хемиско оружје. Мисијата ќе има околу 100 члена, а нивна задача е да го спроведат уништувањето на хемиското оружје.
Елена Георгиевска