Унгарија нема да постапува по наредбите на Меѓународниот кривичен суд (МКС) во случај на евентуално апсење на рускиот претседател Владимир Путин за време на неговата посета на Будимпешта, изјави министерот за надворешни работи Петер Сијарто, пренесува Ројтерс.
Изјавата на унгарскиот министер за надворешни работи дојде откако полскиот министер за надворешни работи Радослав Сикорски изјави дека Варшава „не може да ја гарантира безбедноста“ на летот на рускиот претседател доколку неговиот авион прелета над полска територија – дури и алудирајќи на можноста за итно слетување по наредба на МКС.
Коментирајќи ги изјавите од Полска, Сијарто го исмејуваше Сикорски на својот блог за „слепа вера во независноста“ на Меѓународниот кривичен суд.
„Сикорски се осврнува на „независниот“ суд кој, по наредба на тогашниот претседател на Европскиот совет, Доналд Туск, одби да екстрадира човек осомничен за терористичкиот напад што го разнесе гасоводот „Северен тек 2“. Тој случај многу зборува за тоа колку се објективни и непристрасни оние што денес му се закануваат на Путин“, рече Сијарто.
Тој нагласи дека Унгарија нема да дозволи ниту една меѓународна институција да диктира нејзини одлуки во врска со нејзиниот суверенитет и односите со други држави.
Во последниве години, Унгарија се позиционираше како една од ретките земји од Европската Унија што одржува стабилни односи со Москва, одбивајќи целосно да ја прифати антируската политика на Брисел.